Bitte Hilfe Lateinlehrer/Schüler?

Hallo,

die Vokabelhilfen deines Lehrers gehören zu folgenden Gedichten:

LXX.

Nulli se dicit mulier mea nubere malle

     quam mihi, non si se Iuppiter ipse petat.

dicit: sed mulier cupido quod dicit amanti,

     in vento et rapida scribere oportet aqua.

LXXII. ad Lesbiam

Dicebas quondam solum te nosse Catullum,

     Lesbia, nec prae me velle tenere Iovem.

dilexi tum te non tantum ut vulgus amicam,

     sed pater ut gnatos diligit et generos.

nunc te cognovi: quare etsi impensius uror,

     multo mi tamen es vilior et levior.

qui potis est, inquis? quod amantem iniuria talis

     cogit amare magis, sed bene velle minus.

LXXXIII. ad Lesbiam

Lesbia mi praesente viro mala plurima dicit:

     haec illi fatuo maxima laetitia est.

mule, nihil sentis? si nostri oblita taceret,

     sana esset: nunc quod gannit et obloquitur,

non solum meminit, sed, quae multo acrior est res,

     irata est. hoc est, uritur et loquitur.

LXXXV.

Odi et amo. quare id faciam, fortasse requiris.

     nescio, sed fieri sentio et excrucior.

CIV.

Credis me potuisse meae maledicere vitae,

     ambobus mihi quae carior est oculis?

non potui, nec, si possem, tam perdite amarem:

     sed tu cum Tappone omnia monstra facis.

CIX. ad Lesbiam

Iucundum, mea vita, mihi proponis amorem

     hunc nostrum inter nos perpetuumque fore.

di magni, facite ut vere promittere possit,

     atque id sincere dicat et ex animo,

ut liceat nobis tota perducere vita

     aeternum hoc sanctae foedus amicitiae.

Wenn du diese Gedichte gut vorbereitest, sollte bei deiner Lateinarbeit alles glatt verlaufen! Ich persönlich würde auf die 72 tippen!

LG